Klubi i mendimit ekonomik

AKU: Ulet sasia e importit të vajit të palmës, 31.2% më pak gjatë 2018-ës

Autoriteti Kombëtari i Ushqimit ka pasur në fokus të veçantë Operatorët e Biznesit Ushqimor, me aktivitet ekonomik “Prodhim, përpunim, ambalazhim e fabrikim të qumështit dhe nënprodukteve të tij, tregtim me shumicë e pakicë i tyre, import-eksport i tyre”, për të goditur e parandaluar falsifikimin e produkteve ushqimore me bazë qumështi. Konkretisht, zëvendësimin e ajkës/gjalpit të qumështit me vaj palme apo/dhe niseshte në produkte si djathë kaçkavall, gjizë, salcë kosi etj.

Përpos ndëshkimeve me masë administrative ndaj këtyre OBU-ve, si dhe rishikim e revokim në miratimin e etiketave të disa produkteve të përbëra (duke eliminuar shfaqjen në etiketë të fjalës produkt qumështi në to),  AKU ka ndërmarrë nismë të gjerë sensibilizuese, duke i dërguar secilit prej operatorëve të sektorit shkresë të dedikuar lidhur me kërkesat ligjore për prodhimin e etiketimin e produkteve të përbëra sipas kartës teknologjike dhe konseguencat ligjore në rast shkeljesh.

“Në disa raste kemi depozituar edhe kallëzime penale ndaj shkelësve për veprën penale të mashtrimit e falsifikimit, pasi niseshteja dhe vaji i palmës i shtuar në këto produkte (djathë kaçkavall, gjizë, salcë kosi etj.) nuk ka pasur dhe nuk përligj nevojën për qëllime ndihmëse në produkte (si jetëgjatësinë, butësinë, apo maturimin etj.) por janë përdorur për të rritur abuzivisht volumet e prodhimit duke tjetërsuar karakteristikat e produktit pra duke kryer mashtrim të konsumatorit”, thekson AKU në njoftimin për shtyp.

Gjithashtu, Autoriteti Kombëtar i Ushqimit ka propozuar ndryshime në Kodin penal, duke parashikuar norma penale specifike kundër falsifikimit e mashtrimit ushqimor.

Gjatë vitit 2018 importi i vajit të palmës është ulur me 31.2%.

AKU ju bën thirrje konsumatorëve që të vlerësojnë e verifikojnë produktet sipas etiketës dhe në raste dyshimesh të denoncojnë pranë Autoritetit Kombëtar i Ushqimit, në e-mailin zyrtar info@aku.gov.al, aplikacionin online “Inspektori Dixhital” ose pranë portalit të bashkëqeverisjes.

Lini një koment

Email i juaj nuk do publikohet